Jèp de Montoya, president del Institut d’Estudis Aranesi
Dubertura dera delegacion en Barcelona
Er Institut d’Estudis Aranesi – Acadèmia Aranesa dera Lengua Occitana daurís delegacion en Barcelona entà reforçar era preséncia der occitan en Catalonha
Era importància dera lengua occitana
Era lengua occitana ei ua des granes lengües istoriques d’Euròpa. Coneishuda coma era lengua des trobadors e des trobairitz, s’estenec pendent era Edat Mejana des der Atlantic enquiara Mediterranèa e des des Aups enquiàs Pirenèus. Er aranés n’ei era varietat pròpria dera Val d’Aran, oficiau en tota Catalonha des de 2006, e cooficiau en Estat espanhòl.
Aué ei ua lengua viua que se parle, s’escriu e se transmet en dia a dia (ena escòla, es mieis de comunicacion, en encastre administratiu, en sector culturau…). Ei ua part inseparabla dera identitat aranesa e ei, ath còp, ua aportacion unica ara diuersitat culturau e lingüistica de Catalonha e d’Euròpa.
Institut d’Estudis Aranesi – Acadèmia Aranesa dera Lengua Occitana
Er Institut d’Estudis Aranesi – Acadèmia Aranesa dera Lengua Occitana (IEA-AALO) ei era autoritat lingüistica der aranés. Fondat iniciaument coma organisme de recèrca sus eth territòri e era cultura araneses, en 2014 aqueric era condicion d’acadèmia a trauès deth Decrèt 12/2014 dera Generalitat de Catalonha. Des d’alavetz, ei era referéncia oficiau dera lengua occitana en Estat espanhòl.
Ua hita istorica entara lengua e era cultura occitanes
Era dubertura dera delegacion en Barcelona ei ua actuacion de gran impacte qu’a per objectiu enfortir era preséncia dera lengua occitana en Catalonha e facilitar era ampliacion dera activitat dera Acadèmia mès enlà deth territòri aranés, pr’amor qu’er occitan ei part dera identitat collectiva catalana e deth patrimòni europèu.
Enquia ara, era Acadèmia sonque auie sedença en Vielha, çò qu’auie limitat era sua preséncia e era capacitat d’interlocucion damb era rèsta de Catalonha, situant-se coma era soleta acadèmia deth territòri sense sedença en Barcelona.
Era dubertura dera delegacion ena capitau catalana ei, donques, un saut qualitatiu que:
- facilitarà era coordinacion damb institucions academiques e culturaus, especiaument damb er Institut d’Estudis Catalans
- permeterà aufrir assessorament lingüistic personau e coordinar naui projèctes de recèrca, convertint era delegacion en punt de trobada entàs entitats e professionaus vinculadi ara lengua e ara cultura occitanes,
- situarà er aranés en un espaci mès visible laguens des politiques culturaus e lingüistiques de Catalonha.
Era naua sedença serà plaçada en Carrèr Maria Aurèlia Capmany, 14-16 (Ciutat Vella, Barcelona), laguens des installacions dera libreria der Institut d’Estudis Catalans. Vos convidam a visitar-la.
La dubertura de la delegacion a programat tres actes
Entà celebrar aguesta hita istorica entara lengua occitana, er IEA-AALO a programat tres actes ena sedença der Institut d’Estudis Catalans, a on serà plaçada aguesta naua delegacion.
Inauguracion institucionau
Diuendres 3 d’octobre de 2025
18.30 h – Sala Prat de la Riba (IEC)
Er acte includirà parlaments institucionaus damb era participacion de Teresa Cabré, presidenta der IEC, e de Jèp de Montoya, president der IEA-AALO. Tanben i intervieràn es academics Patrici Pojada damb era conferéncia “Collaborar al servici de la lenga occitana: un projècte per un futur compartit”; e Ramon Sistac damb era conferéncia “Lengües bessoes per genetica o per aleitament?”. Er acte compdarà damb era intervencion musicau d’Eric Fraj e s’acabarà damb un aperitiu inaugurau.
Session plenària
Dissabte 4 d’octobre de 2025
Per prumèr còp, era session plenària dera Acadèmia aurà lòc en Barcelona, enes naues installacions dera delegacion, damb era reünion generau e es trobades des seccions academiques, era aranesa e era estandard.
Aguest acte ei intèrn e reservat as membres dera Acadèmia.
Clauson deth 12au cors academic
Dijaus 18 de deseme de 2025
19.00 h – Sala Pere i Joan Coromines (IEC)
Era delegacion acuelherà era prumèra clausura academica der IEA-AALO celebrada a Barcelona. Er acte repassarà es projèctes e activitats deth cors, damb intervencions des membres dera Acadèmia e eth discors de clauson deth president Jèp de Montoya. Tanben compdarà damb ua actuacion musicau e un petit aperitiu.
Damb era collaboracion de
Damb eth supòrt de
